Q. Horatius Flaccus non omnis moriturus

exegi monumentum aere perennius regalique situ pyramidum altius, quod non imber edax, non aquilo impotens possit diruere aut innumerabilis annorum series et fuga temporum. non omnis moriar multaque pars mei vitabit Libitinam; usque ego postera crescam laude recens, dum Capitolium scandet cum tacita virgine pontifex. dicar, qua violens obstrepit Aufidus et qua pauper aquae Daunus agrestium regnavit populorum, ex humili potens, princeps Aeolium carmen ad Italos deduxisse modos. sume superbiam quaesitam meritis et mihi Delphica lauro cinge volens, Melpomene, comam.

sculpsi quod potui. stant mihi carmina sicut durus onyx: ardua pyramis, inconfundibilis, quam furiosius non atrox Aquilo diruat irrito sub flatu. rabidis non dabor imbribus; annorum haud jugulat tardius ocius, vastatrix hominum, turba fugacior. si circumspicias, hoc modo cogita: non omnis moriar; plurima pars mihi vitabit Libitinam; urna morabitur constans, incolumis, plus Capitolio. dicar, qua rapidus volvitur Aufidus: primus Castalium barbiton Italis adduxi auriculis. filia Apollinis, adsta, magnificam da mihi gloriam: cingas, Musa, caput frondibus inclytis!